Sot rreth orës 03:00 të mëngjesit në një parking te rruga “B” në Prishtinë, janë përfshirë nga zjarri katër vetura me ç’rast dikush ka lajmëruar Policinë.
Rastin e ka konfirmuar për Gazeta Papirus, zëdhënësja e Policisë për rajonin e Prishtinës, Flora Ahmeti e cila bën të ditur se dy vetura janë djegur tërësisht, ndërsa dy të tjerat të cilat kanë qenë të parkuara në afërsi nuk janë dëmtuar shumë.
Me tu informuar për situatën, Policia ka marrë masat e nevojshme bashkë me njësinë e zjarrfikësve dhe kanë dalur në vend ngjarje.
Fatmirësisht, zjarri është lokalizuar dhe përveç dëmeve materiale nuk ka persona të lënduar.
Lidhur me rastin, Policia ka nisur hetimet dhe është iniciuar rast si “Zjarrvënie”.
/Gazeta Papirus/
