Gazeta Sinjali raportoi gjatë ditësh së djeshme për një aksion të Policisë së Kosovës, i zhvilluar në Veri të vendit dhe që rezultoi me sekuestrimin e rreth gjysmë kg substancë narkotike marihuanë dhe arrestimin e një personi të dyshuar për shitblerje të drogës. I dyshuari, Hendrit Salihu u prangos te Kërrshi i Dudës në rrugën Mitrovicë – Leposaviq, ku u kap në flagrancë nga Policia.
Burimet brenda Prokurorisë kanë bërë me dije se brenda afatit ligjor është bërë kërkesë për caktimin e masës së sigurisë ndaj të dyshuarit.
Sinjali mëson se seanca është mbajtur gjatë ditës së djeshme, me ç’rast Gjykata ka marrë vendim për t’ia caktuar të dyshuarit një muaj paraburgim.
Ai u ndalua nga Policia teksa ishte në lëvizje me veturën e tij. Me rastin e kontrollit policor nuk u gjet asgjë e dyshimtë, por në afërsi të veturës së tij, zyrtarët policorë sekuestruan drogën, që i dyshuari e kishte hedhur, duke tentuar që t’iu shpëtojë prangave të Policisë.
I riu do të hetohet nën dyshimet për kryerjen e veprës penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
