Fajin për lotët e nënës Hanëmshahe nga Zhazha e Zveçanit, që i rrjedhin rrëke faqeve që nga viti 1999-të, dyshohet se e ka një person.
Në prillin e atij viti, me urdhër të Miodrag Gjorgjeviqit, asaj ia vranë djalin, Flurimin, para derës së shtëpisë, raporton Klan Kosova.
I biri i saj tjetër, Avnia, e kujton mirë veprimtarinë e serbit që u arrestua sot me urdhër të Prokurorisë Speciale.
Nga torturat e tij, e kishte pësuar dikur edhe vetë, bashkë me banorët e tjerë të fshatit.
Ikjen nga ekipi famëkeq i cili vrau, dëboi e plaçkiti shtëpi më shtëpi fshatarët atje, mirë e mban mend edhe një dëshmitar tjetër.
Lajmi që kriminelit Gjorgjeviq iu vunë prangat, iu gëzua nëna Hanëmshahe.
Nga ky operacion i organizuar prej strukturave serbe, përfshirë ushtrinë jugosllave e policinë e tyre, u vranë shtatë civilë, trupat e të cilëve u gjetën pas përfundimit të luftës në varrezat e fshatit Suhodoll. /Klankosova.tv
