Asociacioni i Gazetarëve të Kosovës ka reaguar në mbrojtje pas kërcënimeve që ka marrë gazetarja e Gazetës Nacionale, Eriola Cacaj.
AGK-ja përmes një postimi në Facebook ka konsideruar se gjuha e pronarit të kompanisë nga Prizrenit drejtuar gazetares është e pa pranueshme.
Të njëjtit kanë ftuar të gjitha palët që të përmbahen nga kërcënimet ndaj gazetarëve.
“Kërcënohet gazetarja Eriola Cacaj Redaksia e portalit “Nacionale”, ka njoftuar për kërcënimin që i është bërë gazetares, Eriola Cacaj, e cila po raportonte për tenderin për larjen e automjeteve të komunës së Podujevës. Pronari i kompanisë nga Prizreni, që e ka fituar tenderin dëgjohet në bisedë telefonike duke ofenduar dhe kërcënuar gazetaren, e cila po hulumtonte për kompaninë. AGK-ja, e konsideron këtë gjuhë të papranueshme, dhe fton të gjitha palët të përmbahen nga kërcënimet ndaj gazetarëve, në mënyrë që ata të jenë në gjendje ta kryejnë punën e tyre të papenguar.” – thuhet në reagimin e AGK-së.
Gazeta Nacionale ka publikuar sot një video ku pronari i kompanisë nga Prizreni, fitues i tenderit nga Komuna e Podujevës për larjen makinave zyrtare ka kërcënuar dhe ofenduar gazetaren.
