Kryetari i Partisë së Serbëve të Kosovës, Aleksandar Jabllanoviq, nuk ka përjashtuar mundësin që para ose ditën e zgjedhjeve të 23 prillit të këtë dhunë në pjesën veriore të vendit.
Ai ka thënë se heshtja e Listës Serbe ndaj këtij procesi është e çuditshme.
Sipas tij, kjo heshtje e tyre tregon se po përgatisin diçka.
“Duke njohur Listën Serbe, njerëzit që e udhëheqin dhe metodat që i përdorin, unë për fat të keq, nuk do ta përjashtoja asesi dhunën disa ditë para dhe në ditën e zgjedhjeve. Dhuna është e mundshme, për këtë po flitet edhe në kafeteritë në veri, gjatë bisedës me njerëzit, ata frikësohen çfarë do të jetë reagimi nga Lista Serbe por më së shumti më frikëson se ata janë shumë të heshtur, meqë kur ata heshtin do të thotë se diçka po përgatisin”, ka thënë Jabllanoviq për Radio Dukagjinin.
Politikani serb ka thënë se marrëveshjet që Serbia i ka nënshkruar në Bruksle duhet t`i respektojë.
Ai ka thënë se Lista Serbe nuk duhet ët fshihet pas ujdive që janë arritur në procesin e dialogut.
“Për ç’arsye t’i ftojmë serbët në kryengritje”? Për arsye se janë larguar targat KM? E tash duhet pyetur: kush e lejoi këtë? Këtë e ka nënshkruar delegacioni ynë në Bruksel dhe këtë duhet thënë serbëve, dhe jo t’u thuhet se ne në Bruksel nuk kemi nënshkruar asgjë dhe tash gjoja se neve shqiptarët po na marrin diçka. Tash Lista Serbe dëshiron t’i lajë duart për të gjitha këto dhe të fajësojë një armik imagjinar nga Prishtina”, është shprehur ai.
