Të arrestuarit gjatë aksionit të djeshëm “Brezovica”, sot pritet të dalin para gjyqtarit të procedurës paraprake, ku do të merret vendimi për kërkesën e Prokurorisë Themelore në Ferizaj për caktimin e masës së paraburgimit.
Në aksionin që u zhvillua dje, i cili është vazhdimësi e aksioneve të mëhershme, u ndaluan katër persona, në mesin e të cilëve edhe ish-sekretari i Ministrisë së Infrastrukturës, Xhelil Bekteshi.
Tre të arrestuarit e tjerë që dyshohen për këtë rast janë Xhevdet Shala, Bekim Pireva dhe Islam Fejza, të cilët ngarkohen me veprat penale “Marrje apo dhënie e ryshfetit” dhe “Keqpërdorim i detyrës apo pozitës zyrtare”.
Cak i aksionit të djeshëm ishin gjashtë lokacione, ku u kryen bastisje dhe u gjetën prova materiale si dokumente, telefona e armë, të cilat u konfiskuan nga Policia.
Aksionet e koduara si “Brezovica”, kanë nisur qysh në fund të vitit të kaluar. Në shënjestër të tyre janë personat e dyshuar për lëshimin e lejeve ndërtimore në Parkun Kombëtar “Sharri” në zonën e Brezovicës.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
