Ish-kryetari i Kuvendit Komunal të Zveçanit, Srgjan Milosavljeviq, ka thënë se qytetarët serbë do të mblidhen edhe nesër në një protestë më masovike për të kërkuar lirimin e serbëve të arrestuar si Radosh Petroviq dhe Dushan Obrenoviq nuk lirohen nga paraburgimi si dhe largimin e policisë nga veriu.
Gazetarja e Nacionale, Gentiana Hasani, e cila po raporton nga Zveçani ka thënë se protestuesit pritet të qëndrojnë deri në ora 16:00 para objektit të komunës.
Ndërkohë, Milosavljeviq ka thënë protestat do të vazhdojnë deri në plotësimin e kushteve të tyre, teksa për protestën e djeshme ka thënë se ishte paqësore.
“Siç e shihni të gjithë pas meje dhe përballë jush, sot është një protestë paqësore e qytetarëve tanë dhe kështu ishte edhe dje. Fatkeqësisht dikujt nuk i ka pëlqyer që protesta ka qenë paqësore deri në fund. Ne si qytetarë të komunave me shumicë serbe nuk duam tensione, duam paqe. Është e qartë se dikujt tjetër i përshtatet të krijojë kaos dhe të sjellë trazira në hapësirat tona.” – ka thënë Millosavljeviq.
“Për të informuar opinionin, dua të theksoj edhe një herë kërkesat tona të djeshme, që janë që të gjithë pjesëtarët e policisë speciale Rosu të tërhiqen nga komunat me shumicë serbe dhe që kryetarët e rrejshëm të mos vijnë në ndërtesat e komunave në veriun e Kosovës dhe Metohisë. Kërkojmë liri edhe për qytetarët tanë të arrestuar padrejtësisht Radosh Petroviq dhe Dushan Obrenoviq.” – ka thënë ish-kryetari i Komunës së Zveçanit.
Në protestë janë parë edhe udhëheqësit e Listës Serbe.
