Inspektoriati i Policisë së Kosovës ka parashtruar rekomandimin për suspendimin e një rreshteri policor të Policisë Kufitare, pas një incidenti të ndodhur.
Sipas njoftimit të IPK-së, ndaj këtij zyrtari policor është iniciuar një hetim penal, i cili do të zhvillohet në koordinim me Prokurorinë Themelore të Gjilanit, lidhur me veprën penale “Lëndim i lehtë trupor.”
“Incidenti, ku zyrtari policor është i dyshuar, raportohet të ketë ndodhur në qytetin e Vitisë më 24.03.2025, rreth orës 21:00, pas një mosmarrëveshjeje me një qytetar lidhur me një kontest pronësor. Veprimet hetimore janë duke u ndërmarrë në koordinim me Prokurorinë e Shtetit, ndërsa rasti po trajtohet në procedurë të rregullt.” – thuhet në njoftim.
Sipas IPK-së, hetuesit pritet të ndërmarrin veprime të tjera hetimore për të ndriçuar të gjitha rrethanat e këtij rasti.
