Interi nuk gabon në javën e 25-të të Serie A dhe rikthehet te fitorja pasi mposht Leccen me rezultatin 2-0. Zikaltrit ishin dominues në “Giuseppe Meazza” duke dalë me pikë të plota pas golave të realizuar nga Henrikh Mkhitaryan dhe Lautaro Martinez.
Ndeshja nis mirë për Interin që jep shkëndijën e parë me Hakan Calhanoglu, por goditja e tij është qëndrore dhe nuk krijon probleme për Falconen. Nga ana tjetër Leçe provon të kapë në befasi zikaltrit me disa goditje nga distanca që nuk kanë saktësinë e duhur. Mundësi e mirë edhe për Edin Dzekon, ndërsa sfida zhbllokohet në minutën e 29-të nga Henrikh Mkhitaryan.
Mesfushori armen finalizon një aksion të bukur të Interit dhe me një goditje në limitet e zonës çon topin në rrjetë. Një gol që shton edhe më shumë besimin te lojtarët e Interit që duket se do ta kenë të lehtë fitoren. Pjesa e parë mbyllet me avantazhin minimal të zikaltërve, ndërsa në fraksionin e dytë, është sërish Interi që kërkon të thellojë diferencat.
Në minutën e 53-të Lautaro Martinez lexon mirë një pasim të Denzel Dumfries nga e djathta dhe me një goditje të bukur mposht Falconen për të çuar shifrat në 2-0. Minutat e mbetura flasin vetëm për Interin që menaxhon mirë rezultatin, ndërsa mungojnë rastet e rrezikshme. Në fund sfida mbyllet me fitoren e pastër të Interit që grumbullon tre pikë të rëndësishme në luftën për një vend në zonën Champions. Me këtë triumf zikaltrit rimarrin vendin e dytë dhe ngjiten në kuotën e 50 pikëve, dy më shumë se ndjekësi më i afërt, Lazio.
