Kryetari i Federatës së Basketbollit të Kosovës, Arben Fetahu është shprehur i zhgënjyer pas incidentit të krijuar në finalen e Superkupës së Kosovës në basketboll mes Prishtinës dhe Trepçës.
Tifozeritë e dyja skuadrave kanë hedhur mjete piroteknike, shpërthyese, e gjësende në drejtim të njëra tjetrës, vetëm pak pasi përfundoi pjesa e parë në Pallatin e Rinisë dhe Sporteve në kryeqytet.
I pari i FBK-së i ka dënuar sjelljet e tifozerive, teksa ka thënë se këto ngjarje nuk i shërbejnë basketbollit.
FBK-ja i dënon gjitha aktet e dhunës. Kemi bërë çdo gjë që kemi mundur t’i shmangim incidentet si këto, mirëpo po shihet se është e pamundur. Këto ngjarje nuk i shërbejnë basketbollit. Jam shumë i zhgënjyer, shumë i prekur”, tha Fetahu për Art Sport, raporton Demokracia.com.
Shumë ulëse të tribunave janë thyer dhe janë hedhur në parket nga tifozeritë.
Është dashur intervenimi i pjesëtarëve të Policisë së Kosovës dhe sigurimit për të qetësuar situatën.
Dyja tifozeritë po largohen nga palestra nga policia, ndërsa fillimi i pjesës së dytë nuk ka nisur ende.
