Prokuroria Themelore në Prishtinë po akuzon Gresa Imerin, Antoneta Reçicën, Labinot Dragushën, Lendita Rexhepin, Rexhep Reçicën, Dardan Gërbeshin, Urim Krasniqin, Suzana Mehmeti-Reçicën e Verona Rrahmanin për vjedhje votash në zgjedhjet komunal të vitit 2017, shkruan Insajderi.
Antoneta Reçica akuzohet në cilësinë e kryetares së këshillit të vendvotimit, ndërsa Labinot Dragusha, Gresa Imeri, Lendita Rexhepi, Rexhep Reçica, Dardan Gerbeshi, Urim Krasniqi, Suzana Mehmeti, Verona Rahmani, si anëtarë të këshillit të vendvotimit në qendrën e votimit në shkollën fillore “Nëna Tereza” në fshatin Teneshdoll në Prishtinë.
Të njëjtit sipas prokurorisë, kanë falsifikuar rezultatet e votimit, duke i regjistruar në mënyrë jo të saktë gjithsej 51 vota të kandidatëve brenda subjektit të njëjtë politik.
Sipas aktakuzës, kandidatëve të preferuar të tyre i kanë shtuar 2 vota, duke hequr 49 vota dhe duke i shtuar Partisë Demokratike të Kosovës (PDK) 2 vota, po ashtu ia kanë hequr “Lëvizja Bashkimi” 3 vota, dhe Lidhjes Demokratike të Kosovës (LDK) 46 vota, cilat i kanë bartur në formularin e përputhjes të dhënave dhe rezultateve, me këtë rast kanë dëmtuar kandidatët brenda subjekteve politike dhe KQZ-në.
Ndërkohë sot, gjykata ka paralajmëruar se do të lëshojë urdhëresë për sjellje me detyrim në seancës ndaj të akuzuarës për falsifikim të rezultatit të votimit, Gresa Imeri.
Gjykatësi Agim Kuçi, lidhur me mungesën e të akuzuarës Imeri ka thënë se e njëjta ka qenë e njoftuar nga seanca e kaluar, mirëpo mungesën e saj nuk e ka arsyetuar. E pranishme nuk ka qenë as e akuzuara Suzana Mehmeti-Reçica, për të cilën gjykatësi Kuçi ka njoftuar se në fletëkthesën e kthyer në gjykatë, është shënuar se pala është panjohur.
Si rrjedhojë, në mungesë të kushteve ligjore për fillimin e këtij gjykimi, seanca e radhës u caktua më 18 prill 2023.
