Asnjë institucion shtetëror nuk ka marr përgjegjësi për arratisjen e njërit prej njerëzve më problematik e të kërkuar në Kosovën e pasluftës – Enver Sekiraqa.
Tek në ditën e katërt, Policia ka konfirmuar se e ka njoftuar me një raport gjykatësin e Apelit, që e ktheu në paraburgim, se Sekiraqën nuk kanë arritur ta gjejnë në vendbanimin e tij.
Por, Policia nuk është përgjigjur se në cilën datë ata e kanë evidentuar për herë të fundit në organe të drejtësisë Sekiraqën.
Krejt çka dihet është se Sekiraqa në publik u pa për herë të fundit më 29 prill në seancën me fjalët përfundimtare.
Tri ditë radhazi, sipas Policisë ata e kanë kërkuar por nuk e kanë hasur të njëjtin, që ligjërisht ka qenë në liri të plotë së paku nga 3 maji kur trupi gjykues, i kryesuar nga Agim Kuçi e dënoi me 25 vjet burgim por e liroi nga arresti shtëpiak.
Në përgjigjen e Prokurorisë, avokat i tij figuron Besnik Berisha e i cili edhe e ka bërë një reagim në Facebook.
“Meqë ra fjala, Enver Sekiraqa nuk është arratisur, ndaj mos i kryqëzoni ata që e kanë lënë të lirë, e mos i lavdëroni as ata që në shkelje të ligjit dhe kushtetutës e kanë urdhëru masën e paraburgimit”, ka shkruar Berisha që të hënën nuk është përgjigjur në thirrjet e televizionit”, ka shkruar Berisha.
Përgjigje nuk ka dhënë as Gjykata Themelore e Prishtinës nëse kanë iniciuar ndonjë rast për trupin gjykues por shkurt zëdhënësja ka thënë se ‘për veprimet e ndërmarra nga kryetarja e gjykatës, publiku do të informohet me kohë”.
Dikush në këtë mes, ka gjithmonë diçka për të thënë, e ai është babai i Triumf Rizës- vrasja e të cilit u nxit nga Enver Sekiraqa.
Shefqet Riza- Babai i Triumf Rizës tha se “Bile ai, edhe ka një ide se ku mund të jetë duke u fshehur i njëjti.”
Shefqet Riza- Babai i Triumf Rizës deklaroi se “Edhe në muajin shkurt, Sekiraqa ishte liruar nga arresti shtëpiak dhe masa nga Themelorja i ishte zëvendësuar me paraqitje në polici”.
Por, Apeli edhe atëherë e kishte kthyer në arrest shtëpiak duke e vlerësuar pikërisht si rrezik arratisjen e tij nëse lihet krejtësisht në liri.
Pas vrasjes së Triumf Rizës, Enver Sekiraqa ishte për 5 vjet në arrati dhe me drejtësinë u ballafaqua vetëm kur ai vendosi vet të dorëzohet.
