Nuk janë të rralla rastet në vendin tonë kur fëmijët denoncojnë prindërit për dhunë në familje. E një rast i tillë ka ndodhur dje në Hanin e Elezit, ku një djalë i mitur ka raportuar në Polici se ai dhe motra e tij janë rrahur nga babai, raporton Gazeta Sinjali.
Burimet e Gazetës Sinjali brenda Prokurorisë kanë bërë me dije se 11-vjeçari ka njoftuar Policinë se babai i tij ka rrahur atë dhe motrën e tij më të madhe, duke i goditur me shuplakë.
Si rezultat i denoncimit, njësitë policore kanë arrestuar të dyshuarin i cili është shoqëruar në stacion policor për intervistim.
Pas përfundimit të procedurave policore, Prokurori i Shtetit ka nxjerrë aktvendim që 38-vjeçarit t’i caktohet masa e ndalimit në kohëzgjatje prej 48 orësh dhe i njëjti të hetohet nën dyshimet për kryerjen e veprës penale ‘Dhunë në familje’.
