Policia e Kosovës ka bërë të ditur se L.T., 22-vjeçar i dyshuari për vrasje të rëndë vitin e kaluar në Kaçanik është ekstraduar sot nga autoritetet e Gjermanisë.
Sipas policisë, i njëjti është arrestuar ditë më parë në Gjermani, ndërsa ndaj tij është caktuar masa e paraburgimit prej 30 ditëve.
“Policia Rajonale e Ferizajt të dyshuarin e ka dërguar në Gjykatën Themelore në Ferizaj dhe ndaj tij nga gjykata është caktuar masa e paraburgimit prej 30 ditëve, ndërsa në kërkim policor mbetet i dyshuari tjetër H.Q”, thuhet në njoftimin e policisë.
Kujtojmë se më 22 maj 2022, policia kishte marrë informata se në magjistralen Ferizaj – Kaçanik, ka ndodhur një rast, i cilësuar si “vrasje e rëndë”, ku i vdekur kishte mbetur H.B., 31 vjeç ndërsa i plagosur kishte mbetur K.B., 34 vjeç.
