Ish-kryeministri Avdullah Hoti ka theksuar nevojën që Kosova të forcojë lidhjet me Shtëpinë e Bardhë, duke nënvizuar se momenti i shtatorit 2020 nuk duhet të mbetet i vetmi kur vendi ynë ka marrë vëmendjen ndaj aleati kryesor i vendit.
Në një postim në Facebook, Hoti ka deklaruar se qeveria e ardhshme duhet të jetë e përkushtuar ndaj partneritetit me ShBA-në, të ketë një vizion të qartë “për të marrë vendime të mëdha që e nxjerrin vendin nga bataku ku është futur vitet e fund.”
Postimi:
Kosova duhet sa më parë të kthehet në Shtëpinë e Bardhë, që është e vetmja derë ku duhet trokitur për të siguruar njohje e anëtarësime të reja, për projekte madhore infrastrukturore e energjetike, për anëtarësim në NATO e në organizata të tjera, dhe për të marrë garancitë për siguri kombëtare.
Shtatori i vitit 2020 nuk duhet të mbetet momenti i vetëm kur Kosova u nderua dhe u respektua nga Shtëpia e Bardhë.
Qeveria e ardhshme e Kosovës duhet të jetë qartë proamerikane, profesionale e me program të qartë, e mbi të gjitha e guximshme për të marrë vendime të mëdha që e nxjerrin vendin nga bataku ku është futur vitet e fundit. 🇽🇰 🇺🇸
