Nënkryetari i Lidhjes Demokratike të Kosovës (LDK), Lutfi Haziri, ka kërkuar nga presidentja Vjosa Osmani që t’i ulë tensionet në veri të Kosovës përmes detyrës së saj kushtetuese.
Në një postim në Facebook, Haziri ka thënë se presidentët në Kosovë gjithmonë kanë pasur rol unifikues, duke përmendur raste të ndryshme përgjatë historisë.
“Presidentja ta ushtrojë detyrën e saj kushtetuese për uljen e tensioneve në Veriun e Kosovës. Presidentët historikisht në Kosovë kanë pasur role unifikuese, duke dhënë kontributin e tyre në procese të ndryshme siç ishin protestat e dhunshme të vitit 2015, në dialogun e Vjenës e procese të tjera. Ata kanë luajtur rol kyç në raportet e shtetit tonë me shtetet e BE-së, e sidomos edhe me ShBA-të”, ka shkruar Haziri.
