Ministrja e Drejtësisë, Albulena Haxhiu, ka vazhduar sulmet ndaj Gjykatës Kushtetuese, për rrëzimin e ligjeve të Qeverisë Kurti. Haxhiu e ka quajtur Gjykatën Kushtetuese “opozitë të Qeverisë”, duke thënë se po tenton t’i pengojë reformat e tyre.
Ajo ka rikthyer edhe deklaratën e Kryeministrit Albin Kurti, ku ai kishte thënë se Gjykata Kushtetuese mund të garojë në zgjedhjet e ardhshme.
“Në një intervistë, Kryeministri Kurti pati thënë që Gjykata Kushtetuese mund të garojë në zgjedhjet e ardhshme për faktin se politikat që Qeveria po konsideron që janë reforma, ata po tentojnë me i pengu…S’jam tu e sulmu, çfarë sulmi është ky. A mendon ti që secili qytetar, përfshirë edhe unë, kam të drejtë dhanë mendimin tim për veprimet e Kushtetueses. Si Ministre e Drejtësisë, mua po më pamundësohet, veprimet dhe vonesat e Kushtetueses, me i jetësu reformat”, ka thënë Haxhiu.
Duke folur lidhur me vendimin për rrëzimin e tërësishëm të Ligjit për Byronë Shtetërore për Verifikimin dhe Konfiskimin e Pasurisë së Pajustifikueshme, Haxhiu ka thënë se Kushtetuesja qëllimisht e publikoi njoftimin kur Kryeministri Albin Kurti ndodhej për takime në Bruksel.
“Vendimi është marrë disa ditë përpara. Në ditën kur Kryeministri Kurti është në Bruksel, në orën e njëjtë, 3 – 3 e 30, është publiku njoftimi. Pse? Për me humbë vëmendjen që me u vendosë fokusi te Kryeministri Kurti çka ndodhi në Bruksel, mos me u bë i madh vendimi i Gjykatës Kushtetuese. Pak më herët e publikuan një prej ligjeve të tjera që kinse është në përputhje me Kushtetutën, për OSHP thanë që Kuvendi e ka shkel Kushtetutën një ditë përpara, të nesërmen një ligj tjetër thanë që është në përputhje, pas pagës minimale, gjysmë ore ose 20 minuta në kohën kur kishte focus te mediat se çka po ndodhë në Bruksel, del njoftimi i Kushtetueses për Byronë., Kjo është politike”, ka deklaruar Haxhiu në RTV Dukagjini.
