Festivali agro-kulturor “Hardh Fest” ka shpallur datat e edicionit të sivjetëm, i cili do të mbahet më 5, 6 dhe 7 shtator.
Organizatorët e festivalit kanë njoftuar përmes një postimi në Facebook se hyrja për këtë vit do të jetë falas.
Ky festival tradicional zhvillohet çdo vit në qytetin e Rahovecit dhe, përveç mbrëmjeve festive, ofron edhe aktivitete të ndryshme që promovojnë kulturën dhe trashëgiminë e qytetit të njohur për kultivimin e rrushit.
Në skenën e “Hardh Fest” kanë performuar edhe emra të njohur ndërkombëtarë. Vetëm në edicionin e kaluar, publiku pati mundësinë të shijojë një performancë nga grupi i famshëm Gipsy Kings.
Ende nuk është bërë i ditur linë-up i artistëve për edicionin e sivjetëm, por se siç njofton Hardh Fest do të bëhen të ditur më vonë.
“Festivali më i njohur në vend, Hardh Fest, në edicionin e radhës rikthehet “Për kokërr t’qefit” me 5, 6 dhe 7 shtator të vitit 2025. Pas një edicioni jubilar jashtëzakonisht të suksesshëm në vitin 2024, edhe sivjet kthehemi me traditën e festivalit, pra rritja e qëndrueshme nga viti në vit. Hardh Fest 2025 premton nje super edicion dhe do të vijë me shumë risi, një nga kryesoret është se festivali është pa BILETA”, kanë shkruar organizatorët përmes një postimi në Facebook.
