Kryetari i AAK-së, Ramush Haradinaj sot qëndroi në Obiliq, aty ku nderoi të rënët e familjes Rama.
26 vjet pas, Haradinaj kujtoi edhe mbi 180 martirët e lirisë nga Fushë Kosova.
“Në Obiliq, sot nderuam kujtimin për të rënët e familjes heroike Rama. Në fund të marsit 1999, aparati gjenocidal serb ishte mobilizuar në të gjithë Kosovën, duke shtuar dhunën dhe mizoritë ndaj popullsisë shqiptare. Më 27 mars, forcat serbe sulmuan shtëpinë e Agron Ramës. Ai, bashkë me djemtë e tjerë të familjes; Farukun dhe Albertin, iu përgjigj me zjarr armikut, duke luftuar për mbrojtjen e familjes dhe atdheut. Ata qëndruan heroikisht deri në frymën e fundit, duke rezistuar ndaj zjarrit, për të dhënë jetën për lirinë e Kosovës, bashkë me anëtarët e tjerë të familjes. Shembulli i familjes Rama dëshmon se kur atdheu është në rrezik, nuk kursehet asgjë nga vetja.”
“Në këtë përvjetor, kujtojmë gjithashtu mbi 180 martirë të lirisë nga Fushë-Kosova”, ka shkruar Haradinaj.
Po ashtu, i pari i AAK-së, i bëri jehonë edhe hyrjes së forcave serbe në lagjen Dardania dhe në të gjithë qytetin e Pejës
“Ndërkohë, makineria vrastare serbe goditi në Malet e Berishës, duke bombarduar zërin e Ushtrisë Çlirimtare të Kosovës – radiostacionin “Kosova e Lirë”, ku ra dëshmor Elbasan Berisha”, shkroi tutje ai.
