Kryetari i AAK-së, Ramush Haradinaj, ka kërkuar hetim ndërkombëtar për sulmin në kanalet e Ibër Lepencit.
Haradinaj, përmes një postimi në facebook është shprehur se sulmi i mbrëmshëm me përmasa terroriste ndaj infrastrukturës së ujit në veri, shënon aktin më barbar kundër Kosovës.
“Në mbrojtje të Kosovës, me çdo çmim! Sulmi i mbrëmshëm me përmasa terroriste ndaj infrastrukturës së ujit në veri, shënon aktin më barbar kundër Kosovës në krejt periudhën e pasluftës dhe është sulm i drejtpërdrejtë ndaj popullit të Kosovës. Ai për cak ka pasur nxjerrjen jashtë funksionit të dy segmenteve jetike, furnizimin me ujë dhe energji, me qëllim shkaktimin e një krize me përmasa të paparashikueshme. Skenarë të tillë sot shohim veç në agresionin rus ndaj Ukrainës’’, thuhet ndër të tjera në postimin e ish-kryeministrit.
