Siguria publike në Kosovë konsiderohet se po cenohet nga krime të natyrave të ndryshme, e sidomos nga vjedhjet, fenomen ky mjaft shqetësues, që po shkakton humbje e pasiguri në biznese. Një ndër hajnat që ka kryer plot vjedhje në rajonin e Prishtinës dhe ka rënë disa herë në prangat e Policisë, por sërish është liruar nga Prokuroria është edhe Ferat Buzaku.
Buzaku përfundoi në ndalim policor, si i dyshuar për përfshirje në së paku tri raste të vjedhjeve, që kanë ndodhur vitin e kaluar në ‘Market Stina’, ‘Meridian’ dhe ‘Neptun’ dhe pas 48 orëve u lirua.
Pa kaluar as tri ditë nga lirimi, Buzaku dyshohet se ka kryer sërish vjedhje.
Të dielën pasdite, ai dyshohet se ia ka vjedhur kuletën një të moshuari, të cilit ia zuri pritën pasi e mori pensionin.
Për rastin ka njoftuar edhe Policia dhe është bërë e ditur se me vendim të Prokurorit të Shtetit, i dyshuari është dërguar në mbajtje.
“Viktima mashkull kosovar ka njoftuar se i është ofruar një i dyshuar dhe i ka vjedhur kuleten me para të gatshme. Lidhur me rastin njësiti i hetimeve ka arritur që të identifikojë dhe arrestojë të dyshuarin mashkull Kosovar i cili me vendim të prokurorit dërgohet në mbajtje.“
