Pep Guardiola ka thënë se Erling Haalandi e ka mentalitetin e njëjtë me Lionel Messin, por mendon se krahasimet e tilla nuk i ndihmojnë yllit të Manchester Cityt.
Sulmuesi norvegjez e arriti shifrën e 50 golave në të gjitha garat këtë sezon me penaltinë e shënuar në minutën e tretë në fitoren e Cityt 2:1 kundër Fulhamit në fundjavë.
Ky gol ishte i 34-ti vetëm në Premierligë, me të cilin Haalandi e barazoi rekordin e vendosur nga Alan Shearer dhe Andy Cole për më së shumti gola brenda një sezoni të vetëm në Premierligë.
Si pasojë, Haalandi tani po krahasohet me Messin, por Guardiola thotë se legjenda e Barcelonës është i pakrahasueshëm.
“Askush nuk krahasohet me Messin, nuk i ndihmon Haaland por për shënimin e golave dhe për mentalitetit, po”, tha Guardiola, i cili ishte trajneri i Messit për katër vite në Barcelonë.
“Messi e ka bërë këtë gjë për 10 apo 15 sezonet e fundit, por Haaland është në nivelin e njëjtë në aspektin e golave.”
“Pothuajse në çdo ndeshje shënon një ose dy gola, ai ka mundësinë ta bëjë këtë, por Messi është lojtari më i kompletuar që kam parë sa i përket vizionit, driblimeve, pasimeve, konkurrencës dhe shumë gjëra të tjera. Shpresojmë që Erling të jetë aq afër si Leo, që do të jetë fantastike për ne dhe për të”, shtoi ai.
Guardiola e lartësoi Haaland për besimin në vetvete dhe urinë e tij të pangopur për sukses. Trajneri gjithashtu beson se Haaland nuk e ka realizuar ende potencialin e tij të plotë dhe ka insistuar se loja e tij mund të përmirësohet ende më shumë.
“E njoh pak dhe është shumë konkurrues dhe pozitiv në mentalitetin e tij. Ai ka një besim pozitiv të jashtëzakonshëm në vetvete. Nuk është arrogancë. Është besim në vetvete se do të shënojë më shumë. Në sezonin e tij të parë të shënojë 50 gola dhe të barazojë me legjendat si Andy Cole dhe Alan Shearer është diçka e madhe.”
Nëse Haaland shënon në stadiumin Etihad të mërkurën ndaj West Ham, ai do të vendos një rekord të ri në Premierligë me më së shumti gola të shënuar brenda një sezoni të vetëm.
