Grupi i Grave Deputete ka reaguar ndaj lirimit të Naser Pajazitajt, i cili ishte i dënuar për vrasjen e Donjeta Pajazitajt.
Përmes një reagimi për medie, ky grup ka shprehur pakënaqësinë e tyre me vendimin e Gjykatës Supreme, duke kërkuar drejtësi për Donjeta Pajazitajn.
“Donjeta Pajazitaj ishte vrarë në 2015. Për vrasjen e saj në vitin 2017 ishte ngritur aktakuzë ndaj Naser Pajazitaj. Gjykata Supreme sot e ka liruar atë nga akuzat. Vrasja e të ndjerës Donjeta Pajazitaj ishte cilësuar si mizore, trupi i së cilës ishte gjetur shumë më vonë në Bjeshkët e Strellcit. Për ne si Grup i Grave Deputete është e papranueshme që jeta e një gruaje vlen për Gjykatat tona aq pak sa mund të kalojë pa u ndëshkuar askush. Ose me një dënim minor”, është thënë në reagimin e tyre.
Grup ka kritikuar institucionet e drejtësisë, për mos ofrim të sigurisë për grat.
“Institucionet e sigurisë në shumë raste kanë dështuar t’u ofrojnë siguri grave. Pastaj humbet kohë në kapjen e kryersve të vrasjeve. Dhe pas kapjes është e pakuptueshme të lihen të lirë. Ky është inkurajim për dhunuesit. Duke e respektuar punën e gjyqësorit si pushtet i ndarë dhe i pavarur, duam të sigurohemi që të jetë në anën e drejtë dhe për të drejtën. Për këtë rast dhe të gjitha rastet”, është thënë në njoftim.
