Viti 2022 nisi me një ngjarje tragjike e cila ndodhi në Llaushë të Skenderajt.Pikërisht me 5 janar të këtij viti një grua u privua nga jeta duke u vrarë nga bashkëshorti i saj.
Nga informacionet e para lidhur me këtë rast është theksuar se dyshohet se i dyshuari S.Q, kishte përdorur dhunë fizike ndaj viktimës L.Q edhe disa herë të tjera.
Madje viktima e këtij rasti gruaja 48 vjeçare e kishte raportuar dhunën që po përdorej ndaj saj në stacion policor pikërisht më 1 janar të këtij viti.
Por procedura e këtij rasti ishte zvarritur dhe si shkak e njëjta edhe humbi jetën.
E lidhur me këtë rast reagime të shumta pati nga drejtuesit e institucioneve në vend.
Ministrja e Drejtësisë, Albulena Haxhiu është deklaruar për rastin tragjik ku tha se në institucione nuk ka vend për njerëz të tillë.
“Edhe sa gra duhet të vriten nga bashkëshortët, në mënyrë që të ketë veprime dhe reagime të menjëhershme në rastet e dhunës në familje?Për vrasjen e rëndë në Llaushë të Skenderajt janë përgjegjës institucionet prandaj përveç dënimit maksimal për vrasësin, urgjentisht duhet të ndërmerren masa disiplinore e penale ndaj të gjithë atyre që nuk mbrojtën jetën e të ndjerës.Nuk kanë vend në institucione këta njerëz!”, shkroi ajo.
Por ky rast nuk është i vetmi për të cilin kemi dëgjuar së fundi në Kosovë.
Vetëm brenda vitit 2021 tri femra dyshohet se u vranë nga ata të cilëve iu besuan më së shumti, bashkëshortët. E pa shenja jete si pasojë e të shtënave me armë zjarri brenda vitit të kaluar mbeti edhe Sebahate Morina.
11 ditë para se Lulëzim Sopi të vriste Sebahaten, e bija e saj kishte denoncuar atë për ushtrim të dhunës fizike ndaj viktimës.
I njëjti ishte denoncuar të paktën tri herë për veprën penale “Dhunë në familje”.E pas vrasjes së bashkëshortes, i njëjti kishte vrarë edhe veten.
Në mesin e viktimave si pasojë e dhunës në familje ishte edhe Marigona Osmani, 18 vjeçarja e cila dyshohet se u rrah për vdekje nga bashkëjetuesi i saj.
Vrasja e Marigona Osmanit ishte padyshim një nga ngjarjet më të rënda në vend.
E njëjta ishte rrahur për disa ditë radhazi ndërsa theksohet se është dërguar në qendrën mjekësore pa shenja jete.
Lidhur me këtë rast policia ka arrestuar ish-bashkëjetuesin e saj Dardan Krivaqa si dhe mikun e tij, Arbër Sejdiun.
Ndryshe Kodi Penal i Republikës së Kosovës, dënimin më të rëndë për vrasje parasheh dënimin me burgim të përjetshëm. Këtë vit një dënim të tillë e mori Naser Pajazitaj vrasësi i 22 vjeçares Donjeta Pajazitaj. Megjithatë vrasjet e grave dhe vajzave nuk po ndalen.
Në mesin e shumë grave të vrarë në Kosovën e pasluftës janë edhe :1. Zenepe Bytyqi, Diana Kastrati, Donjeta Pajazitaj, Antigona Morina, Miradie Hetemi, Valbone Nrecaj, Dafina Zhubi, Igballe Llaloshi, Sevdije Berisha, Valbona Marku dhe vajza e saj./Lajmi.net/
