Një incident i pazakontë është raportuar në Lipjan, ku një qytetar ka gjetur dy granata dore brenda një qeseje të zezë në oborrin e tij.
Sipas raportit të Policisë së Kosovës, ankuesi ka njoftuar autoritetet rreth orës 13:00 të së enjtes, ndërsa njësitet policore kanë siguruar vendin e ngjarjes.
Më pas, ekipi për deminim i FSK-së dhe KFOR-it ka ndërhyrë duke kryer një shpërthim të kontrolluar të mjeteve të rrezikshme, pa ndonjë incident.
Policia ka nisur hetimet për të zbuluar se si dhe nga kush janë vendosur granatat në atë lokacion.
