Në Graçanicë, një numër i madh i qytetarëve serbë u mblodhën sot para stacionit policor në shenjë proteste për arrestimin e sotëm të D.M, i dyshuar për krime lufte, gjatë luftës së fundit në Kosovë.
Sipas raportimeve të Kosovaonllajn, vendasit arritën të bllokojnë rrugën edhe pse policia është munduar që t’i pengojë që ta bëjnë këtë.
Në pamjet që i ka ofruar mediumi serb Kosovaonllajn, shihet teksa një polic flet me qytetarët, duke u thënë atyre që kanë të drejtë të protestojnë, por jo edhe ta bllokojnë rrugën. Ai u kërkoi protestuesve që të vendosen në trotuar.
Madje u dha afat tre minuta, duke u thënë se nëse nuk e respektojnë këtë urdhër, “do të ketë intervenim”.
Teksa protestuesit serbë kishin bllokuar rrugën, një veturë kaloi përmes turmës duke rrezikuar qytetarët, të cilën si kundërmasë e goditën atë me grushte e shkelma.
Pasi qëndruan për disa orë aty, ata vendosën të largohen.
Kujtojmë se në njoftimin e Policisë e Kosovës u tha se personi në fjalë i arrestuar dyshohet për krime të kryera gjatë periudhës së luftës në Kosovë (1998-1999).
“Ndaj të njëjtit janë siguruar prova për ekzistimin e dyshimit të arsyeshëm se në bashkëkryerje edhe me pjesëtarë të tjerë, gjatë periudhës së luftës në Kosovë në cilësi të personave zyrtarë (gardianë të burgut) në Prishtinë dhe në paralelen e ndarë nga Prishtina konkretisht në burgun e Lipjanit, në mënyrë sistematike, dyshohet se kanë ushtruar torturë, dhunë fizike, psikike, keqtrajtime dhe maltretime çnjerëzore dhe të skajshme për jetën ndaj të burgosurve shqiptarë”, thuhet në njoftim.
