Kryeparlamentari i Kuvendit të Kosovës, Glauk Konjufca disa vite më herët ishte kundër mbajtjes së zgjedhjeve serbe në territorin e Kosovës, shkruan Insajderi.
Konjufca kishte deklaruar se zgjedhjet e Serbisë në Kosovë janë antikushtetuese dhe se janë në përputhje vetëm me Kushtetutën e shtetit serb, pasi që ata e konsiderojnë vendin tonë si pjesë të tyre.
“Nuk ka asnjë fije dyshimi se zgjedhjet e Serbisë në Kosovë janë antikushtetuese. Zgjedhjet e Serbisë në Kosovë janë në përputhje vetëm me një kushtetutë, vetëm në përputhje me Kushtetutën e Serbisë, sepse aty Kosova është pjesë e territorit të Serbisë, parashihet që Kosova është pjesë e Serbisë dhe kjo është arsyeja që po i mban zgjedhjet edhe në territorin e Kosovës”, kishte thënë Konjufca.
Kryeministri Albin Kurti mbrëmë në një konferencë për media tha se do të lejohet mbajtja e zgjedhjeve të Serbisë në territorin e Kosovës, pasi që dëshirojmë që qytetarëve të iu respektohet e drejta e votës.
“Dëshirojmë që në Kosovë të respektohet Kushtetuta, ligji dhe Rezoluta e 15 janarit dhe nuk duam t’ia pamundësojmë qytetarëve të Kosovës që mund të kenë edhe pasaportë të Serbisë të drejtën e tyre të votës. Mund të ketë dikush qe dëshiron destabilizim, ekscese, incidente, mirëpo këtë nuk do ta gjeni në radhët e popullit të Kosovës dhe as të institucioneve të Republikës. Kemi nevojë për paqe në Ballkanin Perëndimor dhe dita e 3 prillit nuk besoj që të do të jetë ndryshe ”, ka thënë Kurti.
Zgjedhjet parlamentare e presidenciale të Serbisë janë planifikuar të mbahen me datën 3 prill 2022.insajderi
