Kritikat nuk i kurseu për Serbinë. Megjithatë më shumë ato i adresoi për Kosovën.
Përfaqësuesi i Lartë i BE-së për politikë të jashtme, Josep Borrell akuzoi kryeministrin Kurti, duke e lënë fajtor për mosarritjen e ujdisë për targa mes të dyjave vendeve në takimin e së hënës në Bruksel me presidentin serb, Aleksandër Vuçiq.
Bile, ai tutje tha se do t`i njoftojë krejt vendet e Unionit që Beogradi e sidomos Prishtina nuk po respektojnë marrëveshjet ndërkombëtare.
“E di se kjo dërgon sinjal negativ politik. E bëjë shumë të qartë për të dyja palët, se nëse futja në BE është synim e tyre, atëherë të sillen në frymë të tillë”, theksoi Borell në konferencën për media të mbajtur të hënën pas takimit.
Kurti e hoqi fajin prej vetit dhe e hodhi tek Borell, kurse këtë të fundit e kritikoi ashpër për njanshmëri presidentja kosovare, Vjosa Osmani.
Ish-deputetja e Kuvendit të Kosovës, Shqipe Pantina thotë se drejtuesit shtetërorë s`duhet të përfshin në këso përplasje.
“Mendoj se reagimi i Borellit ishte reagim nga zhgenjimi pasi siç duket pritjet nga takimi ishin të ndryshme. Nuk mund ta gjykoj se a ishte gjuhë e njanshme sepse në shumicën e kohës iu referua palëve, me theks të veçantë Kosovës. Por nuk e përjashtoi Serbinë nga përgjegjësia”, u shpreh Pantina për “Front Online”
Ndryshe gjuhën e Borellit e ka parë ish deputeti tjetër, Fatmir Rexhepi.
Kryediplomati, sipas tij, ishte i njëanshëm.
“Për aq sa e kam përcjell, ai vlerësim mund të jetë i njëanshëm. Mendoj se ka dalë përtej misionit që është dashtë. Vlerësoj se ka qenë i njëanshëm”, theksoi Rexhepi për “Front Online”.
“Nuk e ka merituar Kosova me ngrit zërin Borelli ose me paralajmëru para anëtarëve se përgjegjësinë e mban Kosova për dështimin për targa”, vazhdoi tutje Rexhepi.
Tek në orët e para të së martës, ekzekutivi kosovar me kërkesë të Amerikës, e shtyu për dy ditë gjobitjen për shoferët të cilët kanë targa ilegale.
