Betim Gjoshi, Sekretar Organizativ në Partinë Demokratike të Kosovës, ka thënë se partia ku është pjesë, nuk do të dëshironte që Qeveria e kryeministrit Albin Kurti të rrëzohej nga përplasja me ndërkombëtarët.
Ai, në “DPT te Fidani” ka thënë se PDK do të dëshironte që Kurti të rrëzohej nga paaftësia për të qeverisur.
“Kjo qeveri do të kishim pas dëshirë që të rrëzohet nga paaftësia me qeverisë, jo të rrëzohet kështu. Ne nuk jemi opozitë e kësaj qeverie për aspekte nacionale, por jemi kundërshtare për arsimin, shëndetësinë, ekonominë”, ka thënë Gjoshi.
Zyrtari i PDK-së ka thënë se qeveria e Kosovës ka detyrë ta ofrojë një plan për të dalë nga situata e tensionuar në veri, pas tërheqjes së serbëve nga institucionet e Kosovës.
Qeveria e ka për detyrë me ofru një plan. Jemi në një situatë, kur ende mendojmë se ka një rrugëdalje nga kjo situatë”, ka deklaruar ai.
Gjoshi ka thënë se me veprimet e saj, Qeveria e udhëhequr nga Kurti e ka kthyer Kosovën në vitin 2008.
“Një qeveri e përgjegjshme nuk do të ishte ardhë në këtë pozicion. Ka një kthim prapa, do të thoja në vitin 2008”, ka deklaruar ai.
