Një person është arrestuar në Gjilan, pasi dyshohet se me dokumente të falsifikuara ka fituar tender në vlerë prej 155 mijë eurosh në vitin 2021.
Sipas policisë, i dyshuari kishte aplikuar me një dokument kinse të lëshuar nga Ministria e Mbrojtjes.
“Njësia Rajonale për Hetimin e Krimeve Ekonomike dhe Korrupsionit-Gjilan, në bashkëpunim me Prokurorinë Themelore Gjilan, kanë kryer veprime hetimore/operative për disa muaj dhe kanë arritur të sigurojnë dëshmi se i dyshuari me iniciale (A.K.) me rastin e ofertimit në tenderin ’”Furnizim me material për zyre” në Komunën e Gjilanit, kishte falsifikuar dhe dorëzuar referencën e lëshuar më herët në vitin 2021. Me këto referenca ai kishte implikuar Ministrinë e Forcës së Sigurisë kinse kishte lëshuar ketë referencë për kompaninë e tij. Me këto referenca, i dyshuari kishte aplikuar në Komunën e Gjilanit në tender lartshënuar duke fituar dhe firmosur kontratën me komunën e Gjilanit në vlerën 155,000 euro”, thuhet në njoftimin e policisë.
Me këto veprime i dyshuari, dyshohet se ka konsumuar veprat penale “Keqpërdorimi dhe mashtrimi në Prokurimin publik” dhe “Falsifikim i dokumenteve”.
