Gjermania tha të martën se ia ka ndalur ndihmat e reja për zhvillim Ruandës dhe se ishte duke i analizuar zotimet ekzistuese si kundërpërgjigje ndaj rolit të këtij shteti afrikan në konfliktin në Republikën Demokratike të Kongos, vend fqinj i Ruandës.
Ministria e Zhvillimit e Gjermanisë tha se Berlini e kishte njoftuar Ruandën paraprakisht për këtë vendim dhe i bëri thirrje për ta tërhequr mbështetjen për grupin rebel M23, i cili ka bërë avancime në pjesën lindore të Kongos, raporton agjencia e lajmeve “Reuters”.
Kongoja, ekspertë të OKB-së e fuqi perëndimore e akuzojnë Ruandën se po e mbështet këtë grup. Ruanda e mohon këtë dhe thotë se është duke e mbrojtur veten nga militantët etnikë të udhëhequr nga grupi Hutu, të cilët gjoja synojnë të vrasin pjesëtarë të grupit etnik Tutsi në Kongo dhe që po e rrezikojnë Ruandën.
Ministria e Jashtme e Ruandës reagoi ndaj vendimit të Gjermanisë për ndërprerjen e ndihmave të reja, duke e cilësuar si masë “të gabua e kundërproduktive”, transmeton nacionale.
“Shtetet si Gjermania, të cilat bartin një përgjegjësi historike për jostabilitetin e përsëritur në këtë rajon, duhet të dinë më mirë sesa të zbatojnë masa të njëanshme e shtrënguese” – tha të martën në një deklaratë kjo ministri.
Në anën tjetër, ministria gjermane tha se Berlini së fundi ishte zotuar për ndihmë me vlerë të93,6 milionë eurove për Ruandën në tetorin e vitit 2022 për periudhën 2022 – 2024.
Grupi M23 ka kapur disa territore në lindje të Kongos si dhe depozita të çmueshme mineralesh nga janari i këtij viti.
Sulmi që po vazhdon është eskalimi më i rëndë i një konflikti të gjatë, i cili rrënjët i ka te pasojat e gjenocidit të vitit 1994 në Ruandë dhe te përpjekja për kontrollimin e burimeve të mëdha të mineraleve të Kongos.
