Gjatë 24-orëve të fundit në Kosovë, në Policinë e Kosovës janë raportuar 12 raste që kanë të bëjnë me dhunë në familje, raporton teve1.info
Policia e Kosovës ka bërë të ditur se lidhur me 12 rastet e dhunës në familje, 10 persona që dyshohen të jenë shkaktar të dhunës fizike dhe psikike janë arrestuar, dhe dërguar në mbajtje.
Rasti i parë në raportin 24-orësh të PK-së, tregon se babai ka njoftuar Policinë se djali i tij, i cili është me terapi, pasi që ka çrregullime psikike është bërë agresiv dhe ka filluar të bërtas në shtëpi. I dyshuari ka filluar t’i kërcënojë anëtarët e familjes dhe i njëjti pas trajtimit mjekësor, në Klinikën e Pediatrisë me vendim të prokurorit është dërguar në mbajtje.
Në Fushë-Kosovë, janë arrestuar dy persona pasi që dyshohet se kanë ushtruar dhunë ndajë bashkëshorteve të tyre. Njëri rast ka ndodhur dje gjatë mesditës, ku pas një mosmarrëveshje verbale, burri e ka sulmuar fizikisht, derisa i ka shkaktuar plagë për të cilat është trajtuar në spital. Lidhur me ngjarjen, palët janë intervistuar. Ndërsa rasti, tjetër ka ndodhur tri ditë më parë, ku i dyshuari është arrestuar, pasi që dyshohet për dhunë psikike ndaj ish-bashkëshortes së tij. Me vendim të prokurorit të dyja këto raste kanë përfunduar me arrestimin e të dyshuarve.
Edhe rasti në Graçanicë, është i njëjtë, pasi që një burrë dyshohet se në vazhdimësi ka shkaktuar dhunë psikike ndaj bashkëshortes. Viktima në Polici ka raportuar se ka frikë të jetojë me të. Sipas raportit, është kontrolluar shtëpia e tyre dhe palët janë intervistuar, derisa me vendim të prokurorit i dyshuari është arrestuar dhe dërguar në mbajtje.
Rasti në Shtërpcë, ka të bëjë me dhunë në familje si dhe kanosje, pasi që një burrë vazhdimisht ka ushtruar dhunë fizike, madje edhe e ka kanosur djalin e tij. Rasti ka ndodhur dje gjatë ditës, derisa i dyshuari është arrestuar nga Policia dhe është dërguar në mbajtje.
Përveç dhunës ndaj bashkëshorteve, dhunë gjatë këtyre 24-orëve të fundit në Kosovë, ka pasur edhe mes raportit vëlla-motër. Kështu ka ndodhur në Skenderaj, ku një femër është ankuar se është sulmuar fizikisht nga vëllai i saj. Rasti në Policinë e Kosovës është iniciuar “Sulm”, dhe ka përfunduar në procedurë të rregullt.
I arrestuari në Ferizaj, përveç dhunës psikike ndaj bashkëshortes, i njëjti ka ushtruar dhunë edhe ndaj vajzës së tij. Lidhur me këtë rast, vendimi i prokurorit ka qenë që i dyshuari të dërgohet në mbajtje.
Në qytetin e Prizrenit, kanë ndodhur dy raste të dhunës në familje, derisa njëri ka përfunduar edhe me lëndime të lehta trupore. Një person pas mosmarrëveshjes që kishin mes vete dyshohet se ka sulmuar fizikisht bashkëshorten e tij. Derisa, lidhur me rastin prokurori i shtetit ka rekomanduar që pas intervistimit palët të lirohen, dhe rasti të procedohet në procedurë të rregullt.
Rasti i dytë në këtë qytet, ka përfunduar me arrestimin e një personi që dyshohet se pas mosmarrëveshjes ka sulmuar bashkëshorten e tij. Viktima si pasojë e plagëve të marra është detyruar të trajtohet në spital, ndërsa urdhri i prokurorit ka qenë që i dyshuari të dërgohet në mbajtje.
Ndërkohë, rasti në Suharekë që ka ndodhur mbrëmë ka të bëjë me dy persona bashkëshortor, të cilët me çrregullime mendore janë intervistuar nga Policia e Kosovës, pasi që të njëjtit kohë pas kohe janë ofenduar dhe sulmuar mes veti. Lidhur me këtë, me vendim të prokurorit i dyshuari mashkull është arrestuar dhe dërguar në mbajtje.
Rasti i 11 ka ndodhur në Gjakovë, ku një person nën ndikimin e alkoolit ka ushtruar dhunë psikike ndaj bashkëshortes dhe vajzës së tij. I dyshuari me vendim të prokurorit është dërguar në mbajtje.
Ndërkaq, rasti i fundit ka ndodhur në Mitrovicë, ku një grua është ankuar në Polici se është sulmuar fizikisht nga bashkëshorti i saj. Dhuna sipas PK-së, ka filluar si pasojë e një mosmarrëveshje verbale. Ndërsa lidhur me ngjarjen, vendimi i prokurorit ka qenë që i dyshuari të dërgohet në mbajtje. /teve1.info/
