Dy diplomatët nga Gjermania, Knut Abraham dhe Viola Von Cramon, kanë thënë se janë krijuar kushtet që Kosova të anëtarësohet në Këshillin e Evropës. Ata kanë premtuar mbështetje të hapur për Kosovën në këtë proces.
Pas një periudhe të gjatë të izolimit në arenën ndërkombëtare, duket që Kosova ka gjasa të mëdha që të anëtarësohet në Këshillin e Evropës.
E mundësia e anëtarësimit të Kosovës në këtë organizatë, ka alarmuar Beogradin.
Madje Presidenti serb, Aleksandar Vuçiq, ka shkuar edhe më larg duke e kërcënuar Kosovën se Serbia do i tregoj dhëmbët, në rast se synojnë aplikimin në Këshill.
Por rrugëtimin e Kosovës për në Këshillin e Evropës, po e mbështet politikani gjerman nga CDU, Knut Abraham.
Ai për Tëvë1 ka thënë se Kosova e ka përkrahjen e Gjermanisë në këtë proces.
“Ndërsa jemi dëshmitarë të një lufte të tmerrshme në Evropën Lindore, ne duhet të bëjmë gjithçka për t’u ngritur kundër agresorëve dhe mbështesin demokracitë si Kosova. Pasi qeveria vendos të aplikojë për anëtarësim, ne kemi çdo interes për t’u mobilizuar shtetet anëtare të votojnë pro anëtarësimit të Kosovës. Institucionet në Kosovë duhet të kontaktojnë çdo shtet që njeh shtetësinë e saj, demokracinë e saj dhe t’iu thotë atyre se ky është momenti për të vepruar”, tha Abraham.
Se ekzistojnë disa rrethana favorizuese për anëtarësimin e Kosovës në Këshill, e thotë edhe eurodeputetja Viola Von Cramon.
“Pezullimi i Rusisë ka hapur një dritare për Kosovën dhe duhet ta shfrytëzojë atë tani, në përputhje të plotë me partnerët e saj ndërkombëtarë dhe evropianë. Ekziston një mjedis favorizues dhe i takon Kosovës të tregojë se është e gatshme të përmbushë standardet e KE-së dhe t’i përmbahet Konventës Evropiane për të Drejtat e Njeriut. Mbështetja jonë për këtë është e qartë dhe tani i takon Kosovës që ta shtyjë këtë aplikacion në rrugën tjetër”, tha ajo.
Më shumë se 2/3 e shteteve anëtarë të këshillit të Evropës e kanë njohur Pavarësinë e Kosovës. /Gazeta Papirusi/
