Komisioni Evropian ka propozuar heqjen e vizave për shtetasit e Katarit dhe Kuvajtit, në kohën kur Kosova ende mbetet e izoluar, pavarësisht plotësimit të të gjitha kritereve që të merret një vendim i tillë.
Kryediplomati evropian, Josep Borell, ka thënë se ky është një hap që ua lehtëson qytetarëve të këtyre dy vendeve që të udhëtojnë lirshëm në Bashkimin Evropian, përcjell Demokracia.com.
Sipas një njoftimi nga BE-ja, pasi të jetë rënë dakord, shtetasit e Katarit dhe Kuvajtit që mbajnë pasaporta biometrike nuk do të kenë më nevojë për viza kur udhëtojnë në BE për qëndrime të shkurtra deri në 90 ditë, në çdo periudhë 180-ditore për qëllime biznesi, turizmi ose familjare.
Ky propozim vjen pasi Komisioni Evropian vlerësoi një sërë kriteresh, duke përfshirë migrimin e parregullt, politikën dhe sigurinë publike, përfitimet ekonomike dhe marrëdhëniet e bashkimit me të dy vendet.
“Propozimi ynë për të hequr kërkesat për viza për shtetasit e Katarit dhe Kuvajtit është një hap i parë për ta bërë më të lehtë për njerëzit nga i gjithë rajoni të udhëtojnë drejt Bashkimit Evropian. Objektivi përfundimtar është të sigurohet koherenca rajonale dhe në fund të arrihet udhëtimi pa viza”, ka thënë Borell, përcjell Demokracia.com.
Komisioni Evropian vazhdimisht ka vlerësuar se Kosova i ka përmbushuar të gjitha kriteret për heqjen e vizave, sidoqoftë disa ministra të BE-së janë shprehur kundër një vendimi të tillë, duke e penguar lëvizjen e lirë të kosovarëve.
Kryediplomatja Donika Gërvalla – Schwarz, gjithashtu gjatë një viti sa ka mbajtur këtë detyrë nuk është parë të jetë shumë e zëshme apo të ketë lobuar për heqjen e vizave, ani pse kishte premtuar se “do të bëjnë çmos t’i bindin skeptikët se është bërë progres i dukshëm”.
Kjo e fundit, gjatë një viti si ministre e Punëve të Jashtme më shumë është përfolur për skandalet e saj, se që ka bërë ndonjë hap rreth procesit të liberalizimit të vizave.
