1 mijë e 330 gardianë të burgjeve të Kosovës ende nuk i kanë marrë pagat shtesë për muaj mars dhe prill.
Të njëjtit është dashur t’i marrin nga 100 euro për secilin muaj, por kjo ende nuk ka ndodh, ndonëse sot është dita e shtatë e muajit të pestë, shkruan Gazeta Insajderi.
Shërbimi Korrektues i Kosovës i ka 1 mijë e 548 zyrtarë, duke përfshirë edhe gardianët.
Për të gjithë këta punëtorë – më 15 mars të vitit 2021, Qeveria e Kosovës i ka ndarë mjetet e kërkuara nga SHKK dhe sindikata.
Megjithatë pika 1 e vendimit për mjetet e ndara ka potencuar “për pagesën e shtesave për gardianet”, term ky i cili nuk ekziston në asnjë dokument ligjor apo nënligjor, shkruan Gazeta Insajderi
Për të sqaruar se a vlejnë pagat shtesë vetëm për gardianët, apo edhe për zyrtarët korrektues, zyrtarët socialë, kuzhinierët, pastruesit, Shërbimi Korrektues i Kosovës i ka shkruar edhe një here qeverisë më 16 mars 2021.
“Nga Qeveria e kaluar nuk kemi marr përgjigjeje, ndërsa nga qeveria aktuale me vendimin 05/07 të datës 18.04.2021 është zëvendësuar termi “për pagesën e shtesave për gardianet” me termin “për personelin e Shërbimit Korrektues””, thuhet në përgjigjen e Shërbimit Korrektues të Kosovës për Gazetën Insajderi.
Ndërkohë pagat shtesë ende nuk janë ekzekutuar pasi qeveria e ka pezulluar vendimin e datës 15 mars 2021, duke e marrë një të ri më 18 prill 2021, sipas të cilit nuk duhet të paguhen vetëm gardianët, por edhe pjesa tjetër e stafit, pa u përfshirë Administrata e Drejtorisë së Përgjithshme të Burgjeve.
“Shërbimi Korrektues ka gjithsej 1330 personel të uniformuar, në listën për shtesa kemi paraparë të përfshihen të gjithë zyrtarët e institucioneve korrektuese (burgjeve), të cilët kanë punuar në muajin mars dhe prill, pasi që të gjithë kanë punuar brenda ambientit të përbashkët, e ku ka pasur vizita nga jashtë për të burgosur, të burgosurit janë përcjell në spitale, po ashtu personeli me punën e tyre i janë ekspozuar rrezikut të infektimit, thuhet për përgjigjen e SHKK për Gazetën Insajderi.
Nga fillimi i pandemisë e deri më tani 236 punonjës të institucioneve korrektuese dhe 43 të burgosur janë infektuar nga Covid-19.
