Zëdhënësi i KQZ-së, Valmir Elezi, ka komentuar ankesat e shumë qytetarëve për fshirja nga gishtërinjtë të ngjyrës matrikuluesve.
Ai ka konfirmuar ankesat e qytetarëve për këtë çështje, duke thënë se një gjë e tillë do të analizohet në fazat e mëvonshme.
“Gjatë ditës së sotme kemi pranuar informacione, qoftë përmes mediave apo edhe drejtpërdrejt nga qytetarë që ngjyra matrikuluese, e cila vendoset në gisht po shlyhet pas një kohe të shkurtër. E para, ecuria e gjithmbarshme e procesit zgjedhor, përfshirë edhe këto çështje, do të jenë pjesë e analizës së KQZ-së në një fazë të mëvonshme lidhur me përgatitjet që janë bërë dhe sfidat me të cilat jemi ballafaquar. E dyta, shenja që vendoset në gishtin e një votuesi nuk është e vetmja masë e sigurisë që përdoret nga KQZ për të garantuar procesin e votimit”, ka thënë Elezi.
