Gjykata Themelore në Pejë e ka shpallur të kundërligjshëm dhe pa efekte juridike vendimin e drejtorit ekzekutiv të Spitalit të Përgjithshëm të Pejës, Fazli Shala, në lidhje me shkarkimin e drejtorit mjekësor të këtij spitali, Muhamet Haliti, për përfshirjen në rastin e futjes së foshnjës së vdekur në rrobalarëse të këtij objekti, në dhjetor të vitit të kaluar.
Kjo gjykatë e detyron Spitalin e Përgjithshëm të Pejës ta sistemojë Halitin në vendin e mëparshëm të punës, si dhe të paguajë shpenzimet e procedurës në shumë prej 374 euro, në një afat prej 7 ditësh, raporton Klankosova.tv.
Ky vendim i Gjykatës Themelore në Pejë vjen pas parashtrimit të padisë së Muhamet Halitit në janar të këtij viti.
Këtë vendim të kësaj gjykate e ka bërë të ditur vetë Haliti, përmes një postimi në Facebook, ku tha se Shala kishte tentuar që padrejtësisht ta bënte përgjegjës për rastin e foshnjës, duke shtuar se këtë ai e bëri që t’i mbronte personat përgjegjës që ishin të lidhur me rastin.
Sipas tij, qëllimi i Shalës ishte eliminimi me urdhër partiak i njerëzve që kanë bindje të tjera politike.
“Drejtësia i ka dhënë fund këtij pretendimi qëllimkeq të z. Shala duke e detyruar të më kthej në pozitën e mëhershme si drejtor mjekësor i Spitalit të Përgjithshëm të Pejës. Arsye e këtij skenari të turpshëm të dr. Shalës ishte mbrojtja e personave përgjegjës të lidhur me rastin, e që është vetë ai si drejtues i spitalit, në aspektin moral, pastaj drejtorit të administratës, që është mik i tij. Mik i politikës. Mik i partisë në pushtet, i Vetëvendosjes, që i solli ata në këto pozita menaxhuese. E qëllimi ishte i qartë, eliminimi i njerëzve me urdhër partiak që kanë bindje tjera politike”, ka shkruar Haliti në Facebook.
