Denoncimi i familjarit të një pacienteje që kërkoi ndihmë mjekësore në Emergjencën e spitalit ‘Sheikh Zayed’ në Vushtrri kundër një infermieri, ka aktivizuar Prokurorinë në nisjen e hetimeve dhe zbardhjen e rastit. Gazeta raportoi sot se është iniciuar rast ndaj infermierit, nën dyshimet se ka kryer veprën penale “Mosdhënie e ndihmës mjekësore”. Infermieri Kadri Mikushnica ka dhënë rrëfimin në një prononcim për portalin, me ç’rast ka treguar versionin e tij për atë që ka ndodhur.
Sipas informacioneve të para, bashkëshorti i një pacienteje e ka denoncuar Mikushnicën, duke pretenduar se nuk i dha ndihmë bashkëshortes së tij e cila ishte alivanosur në korridor. Bazuar në dëshminë e tij, kjo ka ndodhur për shkak se nuk kanë poseduar një udhëzim nga mjeku i Qendrës së Mjekësisë Familjare.
Por infermieri Mikushnica gjithë denoncimin e ka quajtur shpifje, duke e mohuar se gjendja e pacientes ka qenë e rëndë. Ai tha se rastet kur s’ka udhëzim, nuk i trajtojnë në Emergjencë, prandaj edhe pacientja në fjalë, sipas tij, do të duhej të merrte ndihmë mjekësore në QKMF.
“Për rastin në fjalë është se personi në fjalë është udhëzuar për në Mjekësi Familjare për tretman pasi që ka qenë për t’u trajtuar në nivel primar. Pa një udhëzim nga mjeku familjar në Emergjencë nuk mirret tretman jashta rasteve në Emergjencë, të cilat janë me protokoll. Pacientja e cila ka qenë me: Parametra Vital Ta/125/65 mmHg Spo2 99% Rr/ 78 / minutë normal përpos një temperature 38.1 C* lehtësisht e ngritur apo siç është termi mjekësor Status Febril, që dmth është normale për t’u trajtuar në mjekësi familjare, e menagjueshme e jo në Emergjencë, sepse dihen cilat raste trajtohen në Q.E, raste të cilat janë në rrezik për jetë.“.
Mikushnica tha për Sinjalin se krejt kjo ka ndodhur për shkak të tollovisë që krijohet te Mjekësia Familjare dhe sipas tij, pacientët drejtohen në spital.
Madje ai pretendon se është kërcënuar edhe në prezencë të Policisë dhe është incizuar pa autorizim.
“Por zotnia në fjalë thotë se s’muj pres unë në rend atje së është kallabllak. Pastaj mer telefonin filmon edhe përkundër faktit që janë shenjat e ndalimit të çdo lloj fotografimi apo videoinxhizimit brenda hapësirave të Qendrës Emegjente. Pastaj ka fillu me ofendime me kërcënime edhe në praninë e Zyrtarit Policor.“, tha infermieri.
Ai po ashtu e komentoi shkurt pacienten, për të cilën tha se bëri skena histerike, në momentin që është njoftuar Policia.
Megjithatë, infermieri shtoi se pacientja ka marrë trajtimin mjekësor dhe është liruar nga spitali në gjendje të mirë.
“Pastaj zonja në fjalë kur e kupton se e kam telefonuar Policinë, bën skena histerike, shtrihet përtokë. Nuk kam info më tepër për momentin. E gjitha është kjo, e kemi raportin e trajtimit të pacientit. Pacienti ka marrë tretman, është lëshuar në shtëpi shëndosh e mirë, ashtu ka qenë me të gjitha parametrat normal kur ardhur përpos temp. 38.1 C* që e ceka.”, shtoi tutje.
Në fund, Mikushnica tha se situata të tilla ndodhin shumë shpesh, pasi sipas tij, pacientët nuk kanë durim të presin në QKMF dhe kërkojnë ndihmë në Qendrën Emergjente.
“Dmth gjithçka është shpifje nga ana e personit në fjalë, jemi mësuar me të tilla raste që pritojnë me pritë në Mjekësi Familjare, me marrë tretman sipas udhëzimeve mjekësore, por për më të voglin problem me shku në Emergjencë pa asnjë lloj udhëzimi.”
Ndryshe, ndaj tij, me urdhër të Prokurorit të Shtetit, rasti është cilësuar ‘Mosdhënie e ndihmës mjekësore’, ndërsa veprimet tjera ligjore do merren varësisht nga zhvillimi i hetimeve
