Seanca ndaj Hashim Thaçit, Kadri Veselit, Rexhep Selimit dhe Jakup Krasniqit veçse ka filluar.
Gjykimi ndaj tyre po vazhdon me dëgjimin e dëshmitarit të radhës nga Zyra e Prokurorit të Specializuar.
Aktualisht seanca e filluar po zhvillohet në seancë private, e gjatë ditës që ajo të jetë e hapur për publikun.
Përveç ditës së sotme, edhe nesër dhe pasnesër do të ketë seanca, ku pas vikendit seancat do vazhdojnë nga e hëna deri të enjten, pra, nga 15 deri më 18 maj, teksa më pas do vazhdojnë edhe në datat 22, 23 dhe 24 maj.
Seanca e gjykimit ndaj tyre ka filluar të hënën e 3 prillit, me paraqitjen e akuzave nga Prokuroria e Specializuar.
Në seancën e 3 prillit, Zyra e Prokurorit të Specializuar (ZPS) dhe mbrojtësi i viktimave kanë paraqitur deklarimet hyrëse dhe pas leximit të aktakuzës së ndryshuar nga ana e ZPS-së, ish-presidenti Hashim Thaçi, ish-kryeparlamentarët Kadri Veseli dhe Jakup Krasniqi, si dhe ish-deputeti Rexhep Selimi, u deklaruan të pafajshëm për veprat penale që iu vihen barrë.
Më 4 prill mbrojtja e Thaçit, Veselit dhe Selimit kanë dhënë fjalën hyrëse derisa më 5 prill mbrojtja e Krasniqit ka dhënë fjalën hyrëse.
Që të katërt gjenden në paraburgim në Hagë që nga 5 nentori i vitit 2020, ndërsa akuzohen për krime lufte, përfshirë vrasjet, keqtrajtimet, torturimet dhe mbajtjen peng të njerëzve.
12 dëshmitarë do dëshmojnë si fillim, për të proceduar më pas edhe me dëshmitarët tjerë.
