Sot, në orët e mëngjesit, një zyrtar policor në Gjakovë ka denoncuar në Polici se dikush ia ka shkatërruar disa pjesë të shtëpisë së tij, në fshatin Netic, raporton Gazeta Sinjali.
Rasti ka ndodhur në rrugën “Sadik Zeka”, të këtij fshati ku ndodhet shtëpia e policit, e cila ishte në rinovim e sipër.
Burimet e Sinjait kanë bërë të ditur se bëhet fjalë për zyrtarin policor Qerim Rama, i cili mban gradën e rreshterit policor në pikën kufitare Qafë Morinë, në Gjakovë.
Rreshteri policor ka njoftuar Policinë se ka gjetur të dëmtuara dritaret e shtëpisë, të cilën e kishte blere kohë më parë dhe ne të cilën po kryheshin punime.
Sipas informatave të para, ende s’janë identifikuar të dyshuarit as nuk dihet motivi i këtij rasti.
Prokurori i Shtetit ka urdhëruar që të iniciohet rasti si “asgjësim apo dëmtim prone” dhe të ndërmerren veprime hetimore për zbardhjen e rrethanave të ngjarjes.
Kujtojmë se rreshteri Rama ka qenë i dënuar nga Gjykata për veprën penale kanosje të lidhur me veprën penale të dhunës në familje, pasi akuzohej se në vitin 2019 kishte kërcënuar bashkëshorten e tij./GazetaSinjali/
