Malisheva e ka pësuar humbjen e parë në sezonin e ri të Superligës, pasi u mposht nga Prishtina në Hajvali me rezultat 3:1, ndërsa Feronikeli gjeti fitoren e parë që nga inkuadrimi, duke mposhtur Gjilanin 1:0, në dy ndeshjet e para të zhvilluara në javën e tretë.
Prishtina e filloi shumë mirë takimin, kur gjeti golin qysh në minutën e 11-të me anë të Leotrim Kryeziut, që shënoi për 1:0 nga penalltia.
Për dyfishimin e epërsisë u kujdes Drilon Islami, kur shënoi në minutën e 38-të për 2:0, që ishte rezultati i pjesës së parë.
Në pjesën e dytë u shënuan edhe dy gola, nga një për skuadër. Prishtina thelloi rezultatin në 3:0 me anë të Hasan Hysenit në minutën e 62-të, ndërsa Malisheva krejt çfarë bëri në këtë takim ishte goli i Robert Ndijgi për 3:1 në minutën e 68-të, që doli të ishte rezultati përfundimtar i takimit.
Tani Prishtina me dy fitore dhe një barazim është lider i përkohshëm i Superligës së Kosovës, ndërsa Malisheva me humbjen e parë këtë sezon, mbetet në pozitën e dytë.
Në ndeshjen tjetër që u zhvillua në Drenas, mes Feronikelit 74 dhe Gjilanit, fitore minimale shënoi skuadra vendase.
Shpresim Zogu ishte golashënuesi i vetëm i takimit, kur shënoi për skuadrën e porsainkuadruar në minutën e 85-të për 1:0.
Këto janë pikët e para për skuadrën nga Drenasi, ndërsa Gjilani mbetet në kuotën e një pike me barazimin në javën e kaluar ndaj Prishtinës.
