Ka shumë raste kur gratë kosovare nuk ‘shpëtojnë’ nga problemet edhe pse zgjedhin që të shkurorëzohen e të ndajnë rrugët me bashkëshortët e tyre, të cilët u shkaktojnë telashe. Edhe pas ndarjes, shumë nga ta nuk i lënë rehat ish-partneret e tyre, raporton Gazeta Sinjali.
Shpesh herë ndonëse viktimat pajisen me urdhërmbrojtës, as kjo nuk i ndalon të dyshuarit që të vazhdojnë dhe të shqetësojnë ish-partneret e tyre. Një rast i tillë ka ndodhur dje në Ferizaj, ku një burrë dyshohet se ka kërcënuar ish-bashkëshorten e tij.
Sinjali mëson se viktima pasi është ndarë nga bashkëshorti i saj në muajin tetor të këtij viti, për shkak se nuk është ndjerë e sigurt ka kërkuar që të pajiset me urdhër të mbrojtjes nga Gjykata, mirëpo pavarësisht kësaj, i dyshuari ka vazhduar që ta shqetësojë.
40-vjeçari dyshohet se dje, gjatë kohës që viktima ishte në punë, ka dërguar mesazhe në rrjetet sociale të ish-bashkëshortes, duke e kërcënuar me jetë.
Përballë kësaj situate, viktima është detyruar që të kërkojë ndihmën e Policisë së Kosovës, me ç’rast këta të fundit kanë arritur që të arrestojnë të dyshuarin.
40-vjeçari është shoqëruar në stacion policor për intervistim, ku para hetuesve ka pranuar se ka kryer veprën për të cilën hetohet dhe ka kërcënuar ish-bashkëshorten ani pse ka urdhër të mbrojtjes të lëshuar nga Gjykata.
Pas përfundimit të procedurave policore, Prokurori i Shtetit ka nxjerrë aktvendim që të dyshuarit t’i caktohet masa e ndalimit në kohëzgjatje prej 48 orësh dhe i njëjti do të hetohet nën dyshimet për kryerjen e veprave penale ‘Mospërfillje e Gjykatës’ dhe ‘Kanosje’.
