Gjykata Themelore në Ferizaj ua ka vazhduar masën e paraburgimit të dyshuarve Besnik Salihu, Fadil Salihu, Egzon Salihu, Lindrit Haradinaj, Mujë Ademi, Kadri Gerbeshi, Bashkim Osmani, Bahri Abazi dhe Shukri Haxhiu, nën dyshimin për kryerjen e veprave penale “Fajdeja”, “Shmangie nga tatimi” dhe “Detyrimi”.
Këtë e ka konfirmuar për “Betimi për Drejtësi”, zyra për informim e kësaj gjykate, ku u bë e ditur se të dyshuarve, kjo masë iu vazhdua deri më 26 shtator 2023.Po ashtu, zyra për informim e Gjykatës së Ferizajt konfirmoi se të dyshuarve Shefik Rexhepi, Ramiz Ademi, Nexhmi Abazi, Ardi Saraqi dhe Ajvaz Muzaqi, iu është vazhduar masa e arrestit shtëpiak. Ndërsa, pronarit të Autosallonit “Alberti”, Skender Bajrami, gjykata ia ka vazhduar masën e ndalimit të ofrimit vendit ose personit të caktuar.
Masat në fjalë ndaj këtyre të dyshuarve, u vazhduan deri më 26 shtator 2023.Po ashtu, Prokuroria Themelore në Ferizaj, ka bërë të ditur për “Betimi për Drejtësi” se në rastin e njohur si “Fajdeja”, janë filluar disa operacione të urdhër kontrollit dhe nën hetim janë rreth 40 persona.“Pas përfundimit të hetimeve, pritet të ngritet aktakuza për të cilën do të njoftoheni me kohë nga ana e Prokurorisë Themelore në Ferizaj”, thuhet në njoftimin e kësaj Prokurorie.
Ndryshe, më 5 mars 2023 Gjykata Themelore në Ferizaj kishte caktuar masën e paraburgimit për 14 të dyshuarit e arrestuar për fajde, i vetmi që nuk ishte dërguar në paraburgim për shkak të arsyeve shëndetësore është pronari i Autosallonit “Alberti”, Skender Bajrami, të cilit gjykata i kishte caktuar masën e ndalimit të ofrimit vendit ose personit të caktuar.Dosja e këtij rasti flet se si të dyshuarit e lartcekur kanë përfituar miliona euro përmes fajdesë, shmangies nga tatimi dhe detyrimi.
