Task Forca Anti-korrupsion në Policinë e Kosovës po zhvillon hetime për disa ministra dhe një zëvendësministër të qeverisë Kurti, raporton Betimi për Drejtësi. Ministri i Financave, Hekuran Murati, Ministrja e Punëve të Jashtme, Donika Gërvalla, Ministri i Pushtetit Lokal, Elbert Krasniqi, Ministrja e Ekonomisë dhe Ndërmarrësisë, Rozeta Hajdari, Ministri i Kulturës, Hajrullah Çeku dhe Ministri i Infrastrukturës Liburn Aliu janë në mesin e ministrave nën hetime sipas raportimeve të mediumit.
Hetimet mbi Ministri Murati lidhen me akuzat se ai ndaloi në mënyrë të kundërligjshme pagat e mësimdhënësve gjatë grevës së tyre. Task Forca po heton këtë rast si kallëzim penal. Ministri Murati është ftuar për të qenë i intervistuar si i dyshuar, por ai ka refuzuar dhe ka kërkuar të intervistohet në zyrat e tij, kërkesë që i është refuzuar.
Arrestimi i Mujkës / Konfirmohet arrestimi i Faruk Mujkës së VV-së, sekuestrohen 60 mijë euro gjatë bastisjes
Ministrja Gërvalla, në bashkëpunim me zëvendësministren Liza Gashi, dyshohet se kanë dhënë plotë 1 milion e 40 mijë euro në organizatën “Caritasin Zviceran”, e angazhuar për kryerjen e shërbimeve OJQ-në Germin, në të cilën Liza kishte qenë drejtoresh para se të bëhej zëvendësministre. Deri më tani, sipas raportimit, i janë paguar “Caritasit 344 mijë euro.
Task Forca po heton edhe shpenzimet e rreth 300 mijë eurove në mënyrë të kundërligjshme për projekte për minoritetet, dhe ky hetim lidhet me Ministrinë e Pushtetit Lokal, Elbert Krasniqi.
Ministrja e Ekonomisë dhe Ndërmarrësisë, Rozeta Hajdari, është gjithashtu nën hetim nga Task Forca. Ajo dyshohet për keqpërdorim të detyrës zyrtare në lidhje me blerjen e miellit dhe vajit nga rezervat shtetërore, duke shkaktuar dëme buxhetit të shtetit.
Ministri i Kulturës, Hajrullah Çeku, dhe disa zyrtarë të tjerë të Ministrisë së Kulturës janë intervistuar nga Task Forca në lidhje me një kontratë për konsulencë me vlerë 130 mijë euro. Konsulenti i angazhuar, një arkitekt vendor, dyshohet se merr pagesë mujore prej 5 mijë e 550 euro.
Task Forca Anti-korrupsion po heton edhe Ministrinë e Infrastrukturës, e udhëhequr nga Liburn Aliu. Zëvendësministri Hysen Durmishi po hetohet në lidhje me tenderin e tiketave, pasi ka dyshime për zbrapsjen e tij pas nënshkrimit.
