Në konkursin për kryetar dhe katër anëtarë të Organit Shqyrtues të Prokurimit (OSHP), i cili ka qenë i hapur nga 10 deri më 24 dhjetor 2021, kanë aplikuar gjithsej 25 kandidatë.
Kjo është konfirmuar përmes një përgjigje me shkrim për “Betimi për Drejtësi”, dhënë nga Zyra e Kryeministrit.
“Ju njoftojmë se në konkursin e shpallur për kryetar dhe katër (4) anëtarë të OSHP-së, gjithsejtë kanë aplikuar 25 kandidatë”, thuhet në këtë përgjigje.
Tutje, Zyra e Kryeministrit bën të ditur se Qeveria përmes vendimit të 12 janarit 2022, ka emëruar komisionin përzgjedhës, i cili më 14 janar ka mbajtur takimin për të shqyrtuar CV-të e kandidatëve, raporton “Betimi për Drejtësi“.
“Qeveria e Republikës së Kosovës me Vendimin Nr.03/54 të datës 12.01.2022 e ka emëruar Komisionin përzgjedhës i cili me datën 14.01.2022 ka mbajtur takimin për shqyrtimin e CV të kandidatëve që kanë aplikuar, çështja është ende në proces”, thuhet në përgjigjen e kësaj zyre.
Lista e kandidatëve që kanë aplikuar për kryetar dhe anëtarë të OSHP:
Ndryshe, Organi Shqyrtues i Prokurimit ka më shumë se një vit që ka mbetur pa Bord funksional.
Nga kjo kohë, në këtë Bord janë dërguar me mijëra ankesa nga operatorë ekonomik lidhur me procese të tenderimit, të cilat nuk mund të trajtohen dhe marrin epilog pa zgjedhjen e Bordit të ri.
Sipas njohësve të prokurimit, tenderët për të cilët ka ankesa të dorëzuara, rrezikojnë të nënshkruhen pavarësisht shkeljeve të pretenduara për shkak të kalimit të afateve ligjore.
Vetëm gjatë vitit 2022, janë ndarë mbi 500 milionë euro për projekte kapitale apo projekte tjera që kalojnë përmes tenderimit publik.
