Mosliberalizimi i vizave për Kosovën po del të jetë gabim i qartë dhe i madh i Bashkimit Evropian për emisarin e Gjermanisë për Ballkanin Perëndimor, Manuel Sarrazin.
Sarrazin, në një intervistë në emisionin “Kallxo Përnime”, ka thënë se dy nga gabimet që duhet të korrigjohen nga Bashkimi Evropian është që të hapen negociatat për pranimin e Shqipërisë dhe Maqedonisë së Veriut, e po ashtu të liberalizohen vizat për Kosovën.
“Të hapim negociatat e pranimit me Maqedoninë e Veriut dhe Shqipërinë dhe më në fund të bëjmë liberalizimin e vizave me Kosovën. Pra, duhet të korrigjojmë dy gabime pasi që këto vendime do të duhej ishin marrë shumë më herët. Pra, duhet t’i korrigjojmë ato”, ka thënë emisari gjerman, duke shtuar se mosmarrja e këtyre vendimeve janë gabime të mëdha dhe të qarta.
Sipas Sarrazin, tani është momentumi kur duhet të korrigjohen këto gabime dhe përmes korrigjimit të krijohet një dinamikë pozitive.
Sarrazin ka thënë se Kosova ka përmbushur që një kohë të gjatë kriteret për liberalizim të vizave dhe se janë duke punuar që t’i bindin dhe miqtë e tyre në mënyrë që të ndodhë ky proces.
“Mund të them se ne po i shtyjmë këto argumente te miqtë tanë. Ne po flasim me miqtë tanë dhe po ju themi se kriteret janë plotësuar që një kohë të gjatë. Nëse ne mund të gjejmë zgjidhje të cilat janë ndihmuese dhe po mundohemi të shpjegojmë edhe dimensionin politik të gjithë kësaj”, ka thënë ai.
Tutje emisari gjerman ka shtuar se BE duhet t’ju tregojë qytetareve të Kosovës se ky vend nuk është në fund të procesit dhe se është një shpresë se këta qytetarë do të kenë një reformë që do të kalojë në këtë vend, ndonëse, sipas Sarrazin mund të ketë probleme me njohjet të cilat janë në tavolinë.
“Duam të tregoni angazhim për vlerat tona duke e luftuar korrupsionin, të keni sundim të ligjit e gjëra të ngjashme të cilat janë të rëndësishme për ne. Pra, liberalizimi i vizave është i nevojshëm që t’u tregohet njerëzve në Kosovë se ne nuk ju kemi harruar, se ju jeni të barabartë, jo vetëm me ne, por edhe me rajonin”, ka shtuar tutje ai.
Sarrazin është pyetur nëse Kosovës nuk po i liberalizohen vizat pasi vendimmarrësit mendojnë se qytetarët e Kosovës janë kriminelë apo do ta kriminalizojnë vendin e tyre.
Ai ka thënë se është vërtetë që ekziston problemi i kriminelëve dhe se kriminelët nga Ballkani Perëndimor veprojnë në bashkëpunim me kriminelët me bazë në Evropën Perëndimore.
Por, sipas tij, ky problem do të ekzistojë pa marrë parasysh a bëhet a jo liberalizimi i vizave.
“Nuk mendoj se dikush që është aktiv në aktivitete kriminale ka nevojë për liberalizim të vizave që të udhëtojë në Bashkimin Evropian”, tha Sarrazin.
