Mëngjesin e sotëm, Policia e Kosovës ka realizuar një aksion në tri komunat veriore ku ka kryer bastisje për disa orë. Operacioni i Njësisë Speciale është shtrirë në gjithsejtë pesë lokacione, prona të Milan Radojiçiq, liderit të grupit terrorist që vrau rreshterin e Policisë së Kosovës, Afrim Bunjaku.
Aksioni ka përfunduar me konfiskimin e disa automjeteve dhe dokumentacionit dhe ka përfunduar pa incidente. Lajmi është konfirmuar për IndeksOnline nga drejtori i policisë së Kosovës në Mitrovicën Veriore, Veton Elshani.
“Operacioni i cili është realizuar në pesë lokacione, në tri komunat veriore, ka përfunduar para pak çasteve. Më vonë do të njoftoheni për rezultatin e tij. Mirëpo mund të konfirmoi se nuk ka pas ndonjë incident”, ka thënë për IndeksOnline, Elshani.
Për këtë operacion, gjatë ditës pritet të deklarohet edhe Prokuroria Speciale, pasi që gjithçka është bërë në koordinim mes policia dhe këtij institucioni./IndeksOnline/
