Zëvendëskryeministri i Kosovës Besnik Bislimi ia lë krejt meritat Qeverisë Kurti për liberalizimin e vizave për qytetarët, shkruan Gazeta Metro.
Bislimi gjatë raportimin në Komisionin parlamentar për Integrime tha se ndonëse ishin plotësuar të gjitha kushtet, “hezitimet e disa vendeve anëtare vazhdonin”.
“Këto hezitime kishin të bënin kryesisht me korrupsionin, sundimin e ligjit, luftën kundër krimit të organizuar si dhe migrimin e parregullt”, tha ai.
Bislimi tha se pas një viti në qeverisje, “shënuam sukses në këto fusha”.
“Nuk mund t’i falënderoj mjaftueshëm të gjithë ata që kanë punuar ditë e natë që ky proces të përmbyllet me sukses”, tha ndër tjerash zëvendëskryeministri, duke përmendur veçanërisht përfaqësuesit e disa ministrive e stafin e tij.
Ndërkaq duhet kujtuar që ishte partia e Vetëvendosjes dhe Besnik Bislimi me kolegë, që u ‘përkujdesen’ për ta shtyrë liberalizimin e vizave, me hedhjen e gazit lotsjellës në Kuvend vite më parë.
Vendimi i liberalizimi të vizave pritet të hyjë në fuqi më 1 janar të vitit 2024 – prej kur qytetarët e Kosovës që posedojnë pasaporta biometrike të lëshuara nga shteti i Kosovës, do të mund të udhëtojnë pa viza në atë që njihet si zona Schengen dhe përbëhet prej 27 shtetesh evropiane.
