Ministri Punëve të Jashtme të Hungarisë, Peter Szijjarto, nëpërmjet një postimi në llogarinë e tij në “Facebook”, ka thënë se presidenti i Serbisë, Aleksandër Vuçiç, ka informuar kryeministrin hungarez, Viktor Orban, për lirimin e tre policëve kosovarë të rrëmbyer nga strukturat serbe të sigurisë më 14 qershor.
“Presidenti serb, Aleksandër Vuçiç, sapo e njoftoi kryeministrin Viktor Orban se, sipas kërkesës së paraqitur në takimin e tyre javën e kaluar, autoritetet serbe së shpejti do t’i lirojnë nga paraburgimi tre policët e Kosovës të arrestuar më parë”, ka shkruar ai.
Kryediplomati hungarez ka thënë se Orbani e vlerëson lart hapin e presidentit serb, të cilin, sipas tij, ai e ka marrë “në një periudhë sfidash serioze”, ndërsa shtoi se vendimi për t’i liruar tre policët është “një dëshmi e qartë e miqësisë së thellë serbo-hungareze dhe e bashkëpunimit strategjik mes dy vendeve”.
