Vetëm vitin e kaluar në Klinikën e Gjinekologjisë janë regjistruar një numër jo fort i vogël i lindjeve nga nënat nën moshën 18-vjeçare. Shifra të larta të rasteve të tilla kanë raportuar edhe spitalet rajonale. Si shkaktarë të këtij fenomeni shpesh janë vlerësuar kushtet ekonomike, edukimi, por edhe rrethana të tjera. Ajo që e bën edhe më shqetësues këtë fakt është se jo rrallëherë të miturat tentojnë edhe t’i braktisin fëmijët e porsalindur, raporton Gazeta Sinjali.
Një rast i tillë ka ndodhur edhe gjatë ditës së djeshme në Qendrën Klinike Universitare të Kosovës, ku Policia ka intervenuar, pasi u njoftua nga spitali se një vajzë e mitur ka lindur fëmijë.
Burimet nga QKUK-ja kanë bërë me dije se viktima shtatzënë ishte pranuar në Klinikën e Gjinekologjisë, ku edhe ka lindur, por më pas ka tentuar që ta braktisë fëmijën e saj të porsalindur.
Posa Policia ka dalë në vendin e ngjarjes është marrë një deklaratë nga viktima në lidhje me rastin, e cila ka thënë se dëshiron të shkojë të familja e saj. Në anën tjetër, zyrtarët policorë kanë ndërmarrë veprimet e nevojshme për të siguruar prezencën edhe të babait të fëmijës.
Lidhur me rastin është vënë në dijeni edhe Prokurori i Shtetit, i cili ka urdhëruar inicimin e rastit si “Bashkësia jashtëmartesore me persona nën moshën 16 vjeç”.
